Hei whakanui i te Wiki o te Reo Māori, neke atu i te rima tekau ngā uri o Te Arawa, kua huihui ki te ngahere o Ōkataina ki te hono anō ki te taiao me te ako i ngā kupu tawhito kei te mōrea noa e pā ana ki te ngahere.
“Kua mimiti haere te puna kupu, te puna reo e hāngai ana ki te ngahere. Nō reirā, tēnei wiki o te reo Māori ko taku whāinga kia hoki mai tērā momo reo nō te ngahere,” hei tā Tame Malcolm, tohunga tiaki taiao.
“Kā kōrero mō ngā whakapapa o ngā rākau, o ngā rongoā. Ngā whakamahinga o ngā rākau me ngā rongoā me te reo e hāngai ana ki ngā koiora nā te ngahere,” hei tā Tame anō.
“Ka haramai ngā whānau ki te ako ki ngā āhuatanga katoa o te Ngahere i te haora kotahi.”
Ko te hīkoi haere i roto i te ngahere ki te akoako i te reo o te Ngahere tētehi kaupapa, ka whakanuia hoki e Tiffany Te Moni, arā, te hiranga o te tae ā-tinana atu ki te ngahere, me te ako tonu i reira, kaua ko te pānui pukapuka noa iho ki rō amkomanga.
“He rerekē te tae ā tinana. Te rongo i ngā kākara i ngā tangi o ngā manu i tōna wairua hoki. Nā reirā, āe! Koirā tētehi o ngā tino kaupapa,” hei tā Tiffany Te Moni.
“Ko te mea nui kia tae ā tinana atu, ka nui te wā ka noho te tangata e pānui pukapuka e kōrero, e wānanga ana mō ngā āhuatanga o te taiao engari ka kore ka tae ā tinana atu,” hei tā anō.
Mā tēnei hīkoi rumaki i te ngahere, e tūmanako ana ēnei uri o Te Arawa ka mau tonu te ahi o te reo Māori me ngā mātauranga tuku iho mā ngā reanga e haere mai ana.