Ki te Karapu Hākinakina o Waikite i Rotorua i te Pō Horoi kua hori, huihui ai ngā kaipōti o Waiariki ki te whakarongo mō te wā tuatahi ki ngā kaitono katoa kei te whai i te tūru Māori nei i te Kōwhiringa Pōti e haere ake nei.
Tokowhā ngā kaitono ka tū ki te aroaro o te minenga: a Rawiri Waititi o Te Pāti Māori, a Tania Waikato o Ngā Kākāriki, a Toni Boynton o Reipa, me Pāpā Wharewera o TOP. Ahakoa te kaha o ngā kōrero mō ngā mahi, ngā whare, me te hauora, i ngā kaipōti tonu te mana whakahaere i te mutunga mai.
E hia rau ngā kaipōti i tae ake arā, ko Pani McLean tētehi nāna tētehi pātai mō ngā kaupapa here mātauranga o ngā rōpū tōrangapū ka tae ake.
“Ko tēnei ko te kotahitanga o tātou, and i runga i te āhuatanga me pērā,” hei tā Pani McLean anō. “Ki ōku whakaaro tātahi anō ka kite tēnei momo āhuatanga ki roto i tēnei tāone. Ka noho tahi tātou ki te whakarongo me ērā momo āhuatanga,” hei tāna anō
“Ko tāku ko Rawiri nō te mea kua kitea e ia te rerekētanga o ngā kura kaupapa ā-iwi nei, o ā tātou nei kura Māori mēki. Me ngā kuratahi mēnā ngā boarding schools. Kua kitea e ia i tērā āhuatanga.”
Ka mihi a Iritana Matenga ki ngā kōrero a Tania Waikato mō te ture RMA, ā, i whai kupu hoki ia mō ngā rangatahi:
“Ki ōku nei whakaaro he rōia a Tania nē? E kōrero ana ia e pā ana ki te RMA. I tino rawe āna kōrero,” hei tā Iritana anō. “Rangatahi mā he tau pōti tēnei. Nā reira, me pōti!”
Ka ū tonu te wairua o te pō ki te akiaki i ngā tāngata ki te whakaputa i tō rātou reo i te pouaka pōti, e tata mai ana te rā kati mō te rrārangi pōti ā te 25 o Ōketopa.