Kua pōwhiritia ngā iwi o Te Nehenehenui i a Te Ariki Te Rangimaheu Te Heuheu Tūkino IX ki Te Awanutu mō te ahurei o Te Nehenehenui “Herea Te Ruru a Te Ihonga”.
“Kua kaha ngā piropiro mō te tae mai o tō tātou Ariki, a Te Rangimaheu i tēnei rā. Kātahi tonu kua whakamōhiotia ki ngā uri a Maniapoto, a Rereahu ki te tūhonohono i waenganui i a mātou, i a tātou i a Maniapoto ki a Tūwharetoa,” hei tā te kaiwhakawā matua o te ahurei, a Tai Huata.
Mai i te tau 2014 kua tino tupu te ahurei o Te Nehenehenui. Ināianei ko te aronga kia whakapūmau i ngā herenga whakapapa o te whānuitanga o Te Nehenehenui.
“Ngā tūhono i waenganui i a te Ariki me Te Arikinui Kuini Nga wai hono i te po kia haere tonu taua herenga me te mea nei kia pupuru, kia kaha, kia tuitui tonu tērā hononga ki te whatumanawa o ngā uri whakaheke,” hei tā Huata anō.
He hononga tuku iho i waenganui i ngā iwi o Ngāti Maniapoto me Ngāti Tūwharetoa, ā, ko te hiahia o ngā e rua kia whakapūmau i tēnei o ngā hononga.
“Ko te whakapapa te honohononga i waenganui i ēnei iwi. Ka mutu, ko Te Rangimaheu kei roto i ōna toto ngā whakapapa e rua. Nō reira, ko ia tērā kua tae mai ki te whakapūmau i ōna honohononga i roto i ēnā whakapapa, otirā ko tōna ingoa, ko Te Ruru a Te Ihonga,” hei tā Herea Winitana o Ngāti Tūwharetoa.
E ai ki a Winitana, he hononga whakapapa mai rānō tēnei me whakapūmautia ka tika.
“Maniapoto, Tūwharetoa nō mai rānō tēnā, kia tōia tēnā whakaaro ki te āpōpō,” hei tā Winitana anō.
E rua rā te roa o te ahurei nei, ā, ka tū a Ngāti Tūwharetoa hei āpōpō, hei whakatutuki i te kaupapa i kawea mai e rātou ki ō rātou huanga o ngā iwi o Te Nehenehenui.