Kua ea te wā ki te tātai i ngā tūnga mō tēnā kapa, mō tēnā kapa ka tū ā tērā tau ki Te Matatini o Ngā Taniwhā ki Hopuhopu.
I muri mai i te pānuitanga o te rārangi tū o Te Matatini o Ngā Taniwhā i te marae o Tūrangawaewae i te ata nei, i kōrero mai a Tony Walker o Te Whare Haka o Tainui me te Kapa o Te Pou o Mangataawhiri kia tutuki tērā wahanga ko te aro ināianei ki te tautoko i te waka katoa me te Kiingitanga ki te manaaki i te motu hei te marama o Pepuere.
“Kua whai tūranga i taua rā, nō reira, kua mōhio mātou mēnā rānei kei te kai parakuihi, he aha hoki te wāhanga ki a mātou ki te haere ki te tautoko i te rohe ki te mahi,” hei tā Tony anō.
“Tēnei tāku Te Matatini tuangahuru mā toru pea, tuangahuru mā whā, no reira taua ahua āno ki kōnei, e rere ana ngā piropiro, e hikaka ana, ēngari he pai ki ahau tēnei hui ki te nohotahi, te whakawhanaunga, ki a kite mātou, kite ko wai ka rītaia, ko wai kua hoki mai,” hei tā Tony anō.
Hei ai ki Anipātene Biddle o Te Kapa Haka Toa Whakaihuwaka o Ngāti Whakaue kei te koa Tōna Kapa ā iwi ki te tū ā te rā tuatahi.
“Well, i te wā i te rongo i te rā e tū ai mātou, e tino harikoa mātou. Te rōpū, hiahia nui mātou ki te tū i te rangi tuatahi. Ānei, kua ea tō mātou wawata, nō reira, hūrō, nau mai Te Matatini o Ngā Taniwhā,” hei tā Anipātene.
“He hōnore nui tērā te mau i te taitara toa whakaihuwaka mō te iwi, i ngā tau e rua nei kua kōrerohia nuitia to mātou iwi, ngā painga o te iwi ana ko te hekenga ki te Taumata o Te Matatini, ae nā taua hekenga i pera ai, no reira i hirahira taua hekenga ki a mātou,” hei tāna anō.
“Ko te kaupapa o Whakaue Whakanuia tētahi o ngā tino kaupapa ki au ki roto mai o Te Arawa, ana ka tū hoki te whakaharatau tuatahi o Te Kapa Haka o Ngati Whakaue i te hanarei o taua mutunga wiki, nō reira ko te whainga ki a tae whakatōpu mai ngā uri o Whakaue ki roto o Rotorua ana ki a mutu te kaupapa o Whakaue Whakanuia.”
E whā ngā puna whakataetae i ngā rangi e whā e harikoa ana te Heamana o Te Matatini a Tā Herewini Parata kua tutuki te kaupapa o te rā.
“Kua piki te taumata ki taumata kē, tika, koinā ngā kapa i tau ki te Matangirua. Heoi, ko wai ka hua, ko wai ka tohu, ko wai ka tau ki te Matangirua a te tau e tū mai nei,” hei tā Tā Herewini.
“Kaore anō kia whakatau ko wai ngā kaiwhiriwhiri koirā anō tētahi āhuatanga kei te kōwhiringia e te poari, e te ao kapa haka i roto i ngā wiki ruarua nei,” hei tāna anō.
I te wā e whakarite ana te ao kapa haka, kei te tū mai hoki he kapa hou, a Te Haona Kaha. I te wā e whakaaro ana mō te tū tuatahi ki te atamira o Te Matatini, i kī a Wairere Ngaia, “E ora ana aku piropiro, e tau pai ana te ngākau i tēnei wā i runga anō i te mōhio kua ea tērā taha. Kua tahuri tātou te waka ki te whakarite ki tō tātou whakataetae e pai ai te tiaki i te motu.”
I te wā e rite ana te katoa, i tāpiri a Wairere, “E tapa tahi ana te wairua i tēnei wā. E rongo ana i te tapa tahi o Tainui waka, kua rite mātou ki te hoe ngātahi.”