I te hui ki Tūrangawaewae Marae, kua oti te tātai i ngā kapa haka mō Te Matatini o Ngā Taniwha 2027, ā, he rongo nui tēnei mō te rohe o Te Kāhui Maunga ki te tūwhera me te whakakapi i te whakataetae nui nei.
Ko Ngā Purapura o Te Tai Hauāuru te kapa Toa Whakaihuwaka o Te Kāhui Maunga ka riro mā rātou i te hōnore nui ki te whakatuwhera i te whakataetae.
“I roto i ngakau whakaiti he tohu nui tēnei ki a huakina mai e Ngā Purapura o Te Taihauāuru, Te Matatini o Ngā Taniwha, nō reira mai i te Matatini o Te Kāhui Maunga ana ka pīoioi ngā taniwha katoa, i ngā kōawaawa katoa o te motu ki a tau ki runga i te awa o Waikato, karanga mai rā Waikato,” hei tā Tamzyn Pue o Ngā Purapura o Te Tai Hauāuru.
“Kua rongo ki te tohu o te wairua, kei te rongo i, me kī wairua o te kīwai e hono nei i a Waikato me Taranaki, kua rangona whānuitia e te motu whānui ngā kōrero e hangai pū ana ki te kīwai, ēngari i a mātou o Ngā Purapura i Te Matatini o Te Kāhui Maunga i whakatakotoria i te kaupapa e hangai pū ana ki ngā poropiti nō reira ki au nei nā ngā poropiti kē tēnei, me kī i poropititia ki a tū a Ngā Purapura o Te Taihauāuru i te rā tuatahi ko te kapa tuatahi o ngā kapa rima tekau mā whitu o te motu,” hei tā Tamzyn anō.
“Ko te tūmanako nui nei ki a tae kotahi mai mātou i runga āno rā i te whakaaro kotahi, te kaupapa kotahi ahakoa he rerekē tangata tō tēnā, tō tēnā o ngā tū o i a kapa o ngā kapa e whā o roto mai ana i Te Kāhui Maunga ki a whakakotahi mātou i te kainga i te tuatahi i mua tonu mai i te tae mai i roto o Waikato.”
I tērā taha o te hātepe, ko Te Kura Nui o Paerangi o Whanganui te kapa e mau ana i te hōnore ki te whakakapi i te whakataetae hei te marama o Pepuere 2027.
“He amo ana ahau i te wahi i tū ai mātou i te whakataetae, i tērā atu o ngā whakataetae i tū tuarua, ana kua whakawhiti atu ki te rā whakamutunga, otinoa te kapa whakamutunga, nō reira i au e titiro atu ki te rarangi haka mō Te Matatini o Ngā Taniwha, kite atu ko Te Kāhui Maunga ka tūwhera i te kaupapa a mā te Kāhui Maunga āno hoki te kaupapa ka whakakapi nō reira he amo ana ahau,” hei tā Tamahaia Skinner o Te Kura Nui o Paerangi.
“He hoki ki te kainga, he timata i ngā mahi, kua timata kē i ngā mahi ki te whakariterite i tō mātou haerenga mai ki kōnei, te tito waiata era ahuatanga, hēoi āno, i ngā marama tata nei ka timata ngā mahi haka e whakarite ai mātou mō tō mātou haerenga mai ki roto o Waikato horopounamu,” hei tā Tamahaia anō.
Kei te tautoko anō ngā kapa o Te Reanga Morehu o Ratana me Ngā Waihotanga i tēnei haerenga. Hei tā Te Taepa Kameta o Te Reanga Morehu o Ratana, “Tuatahi me mihi ake ki tō tātou Arikinui nānā tēnei hui i karangahia ki a whakatata mai mātou me te hoki mahara i tērā wā tonu ko mātou tēnei whakarite ana Te Kāhui Maunga mō te Te Matatini o Te Kāhui Maunga, ā, te wahanga ki a koutou Ngā Purapura mō tō tātou papa a Te Hanataua.”
“Ki a haere mai ki Te Matatini o Ngā Taniwha ki te whakatu atu āno hoki i ngā mahi mo te Hahi, otira, ki te kawe ake i te kaupapa o tō tātou Kingi nana āno timatahia, ko te kotahitanga tēnei me te haere i runga i te maru o te kotahitanga koia tēnei haere nei a Te Reanga Morehu me ōna kaupapa here nei,” te kōrero a Te Taepa.
I te taha o Ngā Waihotanga, e hikaka ana a Te Mihiroa Wright mō te rā e tū ai rātou. “E hikaka ana, e hikaka ana, i mea atu au ki tāku hoa rā, i manifest au i tēnei tūranga mō tātou te rangi tuarua, te turanga tuawhitu ki pai ai tō tātou tautoko i o tātou huanga o Te Kāhui Maunga ōtira our whānau kei āno ngā hau e whā.”
“Kua tukuna mai a maua ko tāku hoa hei mangai i a, i tā tātou ohu e noho ana mohoao ana, e wānanga ana i ngā titonga hou, ngā titonga pārekareka ki a whakapuaki atu ki te iwi,” te whakamārama a Te Mihiroa.