I teenei wiki i whakaputa te Kaawanatanga i te raarangi o ngaa kura 500 moo te hootaka ‘Solar on Schools’ i puta i te Tahua Puutea 2026, aa, kua waimarie a Ngaa Taiaatea Wharekura kua whai waahi raatou ki te kaupapa whakahihiko kura.
“I tae mai te koorero a iimera inanahi raa naa te Kaawanatanga, naa Te Taahuuhuu anoo hoki. Aae, ko maatou teetahi o ngaa kura waimarie me taku harikoa kua whai waahi maatou ki teenei momo tukanga,” hei taa te tumuaki o Ngaa Taiaatea Wharekura, a Michelle Treadaway-Ohia.
E ai ki a Treadaway-Ohia, he nui te utu moo te hiko a te kura, aa, i ngeetehi waa ka whaatoro atu te kura ki te wai me te hau ki te whakahiko i te kura.
“He nui te utu o te hiko ki konei. Ko te mate i teenei waa ka whaatoro atu pea ki te hau, ki te wai anoo hoki hei whakahiko i too maatou kura, aa, ka piki te utu. He nui te utu,” hei taa Treadaway-Ohia anoo.
Tokowhitu ngaa kura o Kirikiriroa ki te Uru ka whakawhiwhia i ngaa papa koomaru mai i te Kaawanatanga. E whakaae ana te Minita Whanaketanga Maaori, a Tama Potaka ki teenei whakatau a te Minita Take Maatauranga, a Erica Stanford.
“Tokowhitu ngaa kura ko Hamutana ki te Uru tae atu ki eetehi atu kura ki Hamutana ki Te Raawhiti. Heoi anoo e tautoko ana i teenei whakatau a te Minita Maatauranga, a Erica Stanford me tana ngana ki te whakahikohiko hoki i ngaa kura ki teetehi mihiini whai hiihii a Tama-nui-te-raa,” hei taa Potaka.
Hei taa Potaka, ko te whaainga kia whakaheke te utu moo te hiko ki ngaa kura maa te whakauru i ngaa papa koomaru.
“Kei iti iho te hikohiko ia te tau, ia te tau. E ai ki te koorero ka waru mano taara ia te kura a toona pae matua nei. Heoi anoo, e tautoko ana eenei mahi whakapaakihi hoki i ngaa pakihi e whakarite mai ana i ngaa raarangi whai hikohiko,” hei taa Potaka anoo.
Hei te Tiihema ka whakamaatauria Te Taahuuhuu o te Maatauranga i te kura kia kite ai meenaa e aahei ana te whakauru i ngaa papa koomaru ki te kura nei.
“Ka tae mai Te Taahuuhuu hei te marama o Tiihema pea. Ka tirohia te kura kia kite meenaa raanei he waahi pai teenei. Kei te whakapono nui au he waahi pai teenei,” hei taa Treadaway-Ohia anoo.