I te marama o Haratua, i pūrongo a Aukaha News i te āhuatanga pōuri o te whānau Naera i muri i te tinihanga a tētahi kāmura, i waiho ai tō rātou kāinga i te āhua kino, i te wā o te hōtoke. Nā te kaha o te tautoko o te ao me te iwi kāinga, he rerekē te āhua o te kōrero i tēnei rā.
Kua eke te mahi hanga whare ki te rima tekau ōrau, he tohu tēnei mō te manawanui o te whānau me te aroha o te hapori. “Mai i te āhuatanga o te pūrongo i torotoro ana ki te ao. Mai Pakistan tae atu ki Amerika, tae atu ki Canada, tēnei pūrongo mō tō tātou Ahirana o te whare nei,” hei tā Michael Naera.
Ehara i te mea ko te pūtea anake te āwhina, engari ko te pūkenga o ngā kaimahi hoki. “Kua tae mai ngā pakihi o te motu nei, mai i Tauranga tētahi plumber ki te whakatika te whare mō ērā mahi. Koia i tuku tētahi koha ki a mātou,” hei tā Michael anō.
Ko te kotahitanga o te marea te mea e hiki nei i te wairua o te whānau i a rātou e mahi tonu ana ki te whakaoti i tō rātou kāinga. “Ko tēnei mahi e mahi ana ki ngā marea o te motu nei. Nā rātou e whakautu mō tēnei mahi wēra pūtea e pai ana ki te whakakīkī tō mātou pēke ki te whakatika te whare e tū ake nei,” hei tāna anō.
Ahakoa ngā uauatanga o te mahi, kua tīmata kē te whānau ki te hoki atu ki te noho ki te papa o runga, he mahi hei hiki i tō rātou wairua. “Ahakoa kāre ka kore e mutu e haere māua ki runga rā, nā te mea kei te hiki mō tō tātou wairua me te āhuatanga o tō mātou hinengaro tērā pea mā ngā maukiuki mānakanaka rānei.”
Ko te tumanako o te whānau, ka oti katoa tō rātou kāinga i mua i te hōtoke o te tau e haere ake nei. Ma Aukaha News ngā whakamahuki i te whānau Naera e tutuki ake nei i te whanaketanga o tō rātou kāinga.
