Kua tae atu te Hīkoi Hōiho mai i Te Matau-a-Māui ki te paepae o Pāremata i te rā nei, me te kawe atu i tētahi petihana e mau ana i ngā haina neke atu i te 50,000 mai i te iwi o Ngāti Kahungunu me Aotearoa whānui, hei tohe kia tiakina te mana me ngā kupu o Te Tiriti o Waitangi i roto i ngā ture o te motu.
“E tika ana te kōrero ko te tūāpapatanga o tēnei whenua. Mihi mai, karanga mai ki ngā waitohu. Kua rima tekau ma rua mano, ono rau whitu tekau ma rua. Homai te pakipaki ki te hunga e whakaaro nui ake ana ki Te Tiriti o Waitangi,” hei tā te Heamana o Ngāti Kahungunu, a Bayden Barber.
“Anei ko tātou e eke nei ki Pāremata i tēnei rā. E kawe nei i te petihana mō tō tātou nei Tiriti o Waitangi te take. Mihi mai, karanga mai, whakanuia, whakamānawatia Te Tiriti o Waitangi,” hei tā Bayden anō.
He tokomaha ngā mema pāremata o ngā rōpū tōrangapū i tae ā-tinana atu ki te tūtaki i te hoiho tahi i kawe nei i te petihana. Ka mutu ka riro mā te iwi te tuku i te petihana ki tō rātou Mema Pāremata mō Ikaroa Rāwiti a Cushla Tangaere-Manuel.
“Kei te whakahē awau, kei te whakahē rawa atu hoki te pāti Reipa i tēnei pire. I panaia tērā Treaty Principles Bill ki waho. Anō nei, kua hokia mai tēnei kaupapa i raro i te mana o tēnei Kāwanatanga o Nahinara,” hei tā Cushla.
“Kua hōhā katoa mātou ki ēnei āhuatanga, kua hōhā hoki a Aotearoa whānui. Nā reira, kei te tū mai ā mātou i te taha o Ngāti Kahungunu, otirā Aotearoa i te taenga mai o tēnei kaupapa, otirā kia whai mana Te Tiriti o Waitangi mō āke ake ake tonu atu,” hei tā Cushla anō.
“Āe he momo hoiho tā mātou, arā, ko te Nāti. Pērā i ngā Wīwī Nāti, koirā hoki te āhua o ō mātou hoiho. Āe, nā reira, me tae mā runga hoiho ka tika. I whawhai ngā hoiho i roto i ngā pakanga o te ao, nā reira, he pakanga anō tēnei kei te haere.”
Te āhua nei ko te katoa o ngā mema pāremata o Te Pāti Kākāriki ka tau atu ki te tūtaki i te ope Hīkoi Hōiho.
“Whakanuia i a rātou o Ngāti Kahungunu, ki a rātou me te hunga kaupoi me te whakamana ki Te Tiriti. Ko tērā te kaupapa o te rā nei,” hei tā te Kaiārahi Takirua o Te Pāti Kākāriki, a Marama Davidson.
“Mārama te kite. He Kāwanatanga kaikiri, he tōrangapū māngere, lazy politics. Me te mea, kei te whakaaro te nuinga o Aotearoa i te aroha me te manaaki o Te Tiriti,” hei tāna anō.
He reo kotahi, he hīkoi kotahi, he whakaaro kotahi – kia mau tonu ki te mana o Te Tiriti o Waitangi mō āke ake ake tonu atu.